花旗股市上禮拜五連續3日創新高，仲升咗150點收市，買盤蜂擁入嚟，只差少少就破13000關收市，今日港股淡友肯定有難，隨時俾人挾四五百點。
中移動（941）上季多賺22巴仙，今日會係帶個市上去嘅主力，滙控（005）走勢都好靚，升破144元，今日有機會升多兩元以上。
本來地產股仲未郁得住，不過，如果好友大挾淡倉，地產股都唔會客氣，一於人升我又升，不妨望多眼。
國企股都應該唔會失禮，睇嚟唔單止強者越強，就算一般嘅股份都會把握機會炒上，如果花旗個市繼續升，港股都會好癲，冇乜邊隻股想自己做落後股。回緊氣嘅「五行三保」隨時都會有作為，保險股睇實國壽（2628），銀行股就留意工行（1398）。

中煤C輪7943：中煤（1898）上禮拜五收8.38元，補番個下跌裂口，如果升破8.52元（10日線），就好大機會破9元炒上，睇9.80元，可以諗吓中煤C輪7943。
7943上周五收28.5仙，槓桿率2.9倍（有效2.6倍），對沖值0.88，正股升上9.80元，7943應該會升到40仙樓上，現價買番啲，正股跌穿8元止蝕。