荷里活又再添喜事！曾獲提名奧斯卡的女演員謝茜嘉謝西婷（Jessica Chastain），噚日同意大利與貴族出身兼時裝品牌高層Gian Luca Passi de Preposulo結婚，巨星好友包括安妮夏菲維（Anne Hathaway）同艾美莉賓特（Emily Blunt）都有現身祝賀。

着住婚紗嘅謝茜嘉一臉幸福，同細佢6年嘅老公企喺教堂門外影相，隨後亦同一眾兄弟及來賓留影。由於老公係意大利貴族，家族受封伯爵頭銜，所以佢哋選擇於意大利威尼斯附近嘅小鎮Treviso結婚，呢度亦係老公家族莊園嘅所在地。佢哋其實由星期三開始就招待一班親戚朋友四處觀光，到星期五晚就舉行婚前晚宴，直到噚日就於教堂完婚，確實可喜可賀。