現年49歲嘅張敏，之前盛傳會復出，又開咗個微博接觸下啲影迷，又試過深夜喺微博撰文，向周慧敏表白姊妹深情。（新聞連結： http://bit.ly/2p8Kqm4 ）

張敏復出未有消息，o依家仲過住不食人間煙火嘅生活，成日周遊列國去聽佛法會，前日佢就同一班信徒自駕遊去到西藏，點知途中遇上汽車爆軚，車上男士們當然要幫手落車修理。而張敏就落車唞下氣休息下，然後拍低現場實況，後來將視頻放咗喺微信朋友圈。

頭先《蘋果》打俾張敏，問佢去西藏有咩活動，佢話：「主要係法會，同行仲有幾位朋友，點知噚晚㗎車行行下爆軚，所以咪要停低換軚囉！因為大家坐咗喺架車度成10個鐘，咁趁機換軚，大家咪落車休息下，兩個鐘後先繼續行程。今日我哋要去亞青寺，聽日一早會有法會聽。」

原來張敏去過西藏好多次聽法會，佢話：「我好鍾意西藏天空，特別藍，風景又靚，所以除咗聽法會外，我都會趁機去觀光，噚日我哋開車去到一個村莊，村長招呼我哋喺屋企食飯，食嘅全部係家常農村菜，好清甜新鮮，平時喺城市真係好少可以食到呢啲農村菜，好感激村長熱情招呼。」

張敏喺90年代幾乎係星爺戲中嘅御用女角，但後來同已故永盛電影公司老闆向華勝分手後，佢就返咗大陸發展，拍咗一輪劇集同電影後突然息影，然後潛心修佛，淡出娛樂圈近22年。今年突然有報道話佢要復出，外界又開始關注佢，而且同時被爆出佢同經理人劉永輝分手，戀上細佢10年嘅大陸年青導演梵師兄（新聞連結： http://bit.ly/2tIHtfG ），佢哋因為經常聽法會而邂逅，估計今次西藏一行，男友梵師兄一定有陪佢一齊去啦？不過，張敏今次就冇承認冇否認，只係話：「唔回應啦！」