有出席當晚聚會嘅人士向八方報料,話有人席間膽粗粗問曾偉雄:「CP(警務處處長英文名縮寫),有啲人直稱你做禿鷹,你有乜回應?」曾偉雄意有所指地答:「如果你叫我做禿鷹,咁你就識嘢啦!因為禿鷹除咗食腐爛東西之外,仲專食蛇、鼠!即係蛇鼠一窩之類 。」
八方聽聞在場人士聽完曾偉雄咁講,一致拍掌叫好。咁到底曾偉雄口中嘅「蛇鼠一窩」,到底係講緊破壞社會治安嘅罪犯、抑或被警方視為破壞社會秩序嘅示威者?相信只可以依靠佢自己解畫咯。
講番毒品調查科,可以講係警隊「一哥」嘅搖籃,除咗曾偉雄外,仲有最少兩名前警隊「一哥」都做過呢個王牌部門,包括已過身嘅許淇安,以及前特首曾蔭權胞弟、現任上市公司新創建執行董事曾蔭培。