有「娃娃男」之稱嘅黃宏舜01年上無綫節目《都市閒情》獻唱一曲《娃娃愛天下》，條片最近上載YouTube一個禮拜瀏覽突破30萬，阿舜嘅騎呢版moonwalk同酒杯手固然抵死，但擔任評判嘅江華叫阿舜抬起頭做人嗰幕都非常爆笑，唔怪得啲網民中晒娃娃毒，睇片上癮唔想瞓啦。

網友填詞惡搞

雖然阿舜一直未有蒲頭，但馮仁昭噚日聯絡到喺北京拍緊劇集《大三元》嘅江華，起初佢對娃娃男印象模糊，但經一番繪形繪聲嘅描述後，即刻勾起佢嘅回憶，江華話：「《都市閒情》呀，有少少印象，不過唔記得咁多，我都冇乜上網睇。」
問江華係咪覺得阿舜唱得好差，先至話佢「太有自信」？佢話：「我諗大家有眼睇，我冇寸佢，做評判係見乜講乜。我話佢過份自信唔係寸佢，只係教佢做人道理，都唔值得點提。」
至於網上流傳話江華喺後台試過俾阿舜窒，江華就否認呢個傳聞：「梗係冇咁嘅事，我完全唔識佢。」
另外，最近有網友喺高登討論區將《娃娃愛天下》重新填詞成《金曲獻江華》，歌詞如「熱舞嗎moonwalk嚇窒專家」、「未夠誇，那香肩轉動如嬌娃」，惡搞得嚟都幾有創意喎。

尋找娃娃男

娃娃男阿舜近期hit爆，如果有讀者識得阿舜或者有佢嘅近況近照，好歡迎電郵至mailto:[email protected]報料。