特首林鄭月娥結束新加坡訪問後，就轉去泰國曼谷訪問，林鄭噚日同泰國外交部長敦巴穆威奈、泰國總理巴育等泰國高層見面，喺泰國有家族生意嘅行政會議召集人陳智思、貿發局主席羅康瑞等，都有陪林鄭同泰國官員見面，不過林鄭見泰國外長時，就發生一段小插曲，令林鄭一時之間唔知點答好。

外長：亞洲兩個女強人

話說林鄭月娥同外長敦巴穆威奈見面嘅時候，外長就引述有講法話亞洲有兩個女強人，其中一個係緬甸國務資政昂山素姬，另一位就係林鄭月娥！有泰國外長咁讚佢，將佢同昂山素姬相提並論，林鄭似乎一時之間唔知點答好，只好以笑回應，其實昂山素姬係國家領袖嘅級數，林鄭只係香港特首，林鄭上面仲有成班京官同國家主席習近平，泰國外長咁抬舉林鄭，八方諗林鄭真係未必敢接受。
至於林鄭同泰國總理巴育見面，林鄭提出希望促進雙方經貿合作發展，而香港貿發局與泰國商務部簽訂國際貿易促進合作意向書，加強兩地貿易推廣，培育初創企業、年青企業家同人才。