一個好騎師絕對可以幫到隻馬好多，你睇雷神、潘頓上期日賽(3月25日)加埋贏七Win，其中個別馬的確靠佢兩個騎功搭夠才贏到，「開心遊戲」、「天胆」、「常山耆寶」、「盈利駿馬」就已經係最佳示範，所以話馬有亦要騎師有至得。

今期(4月2日)賽事有幾駒上場應贏而未贏，第八場四班1400米，「陽明秋秋」剛仗有心添食奈何冇運，何澤堯沿途貼欄一步不蝕，但直路卻重重圍困塞死，最終要夾硬撬開其他馬至望到空，應贏變第二，賽後更被小組警告取位危險，今次2檔理應好跑，如不塞死相信可補中。

另一匹係第十場三班1400米「協勝神駒」，上仗在港初出被捧到唔夠三倍，信心十足，但在貝湯美演繹差劣下全程走外叠，只輸兩身位得第五，賽後循例被小組問話，但給予的解釋絕對得啖笑，小組慣例騎師答完就算。

今次換羅理雅加程至1400米，來港前最長只贏過1300 米，正正因為冇根據或會幫助到降溫，只要有合理賠率回報，此匹超級馬應有番正常發揮交出。