郭富城同女友熊黛林(Lynn)分手，傳係第三者嘅苟芸慧之前委屈想喊，不過今日有報道話，苟姑娘同城城未係拍拖，不過城城確係對苟姑娘有意，更得朋友慫恿，飛熊追苟，Lynn都唔係第一次耍性子話要分手，不過今次弄假成真，城城決定一刀兩斷免麻煩。

報道話城城一直都有同第二啲女仔約會，不過Lynn一直隻眼開隻眼閉，但自從城城同苟姑娘認識之後，Lynn直覺覺得佢好有威脅，所以先有「第二次攻城」，去城城演唱會示威。而Lynn就一向有鋪「玩分手」癮，今年2月情人節Lynn公開話收到男友送嘅鑽石頸鏈，點知城城唔肯認送禮，Lynn大發嬌嗔話分手，城城要公開認女友先討回芳心。

不過，據知Lynn完全打唔入城城嘅朋友圈，城城班friend覺得Lynn太現實又難捉摸，漸漸城城就唔帶Lynn見朋友，反而介紹苟姑娘畀朋友識，個個都覺得佢又乖又文靜，仲慫恿城城換畫，反而係城城嫌苟姑娘太肥。不過兩個人都未到發展階段，Lynn已經出招玩分手，城城覺得不勝其煩，今次嚟真，決定一刀兩斷。

而苟芸慧今朝就喺微博留言:「昨晚下完雨之後，今早一睜開眼睛就看到了溫暖柔和的太陽光。朋友們，謝了！」好似意味深長喎!