有「翻版邵珮詩」之稱嘅2016年中華才藝小姐季軍盧頴萱，最近代表香港參加國際旅遊小姐全球總決賽，現已隻身飛往馬來西亞備戰，狀態大勇。盧頴萱話：「我收到官方邀請後，考慮咗好耐先決定出賽，出發前一星期每日都要由朝到晚作準備，包括搵贊助，揀選二、三十套服裝及高跟鞋，仲要無間斷練習，所以壓力超大。」

抵達馬來西亞不久，頴萱竟然可以喺戰場上交到知心友，佢話：「日本代表個人好nice，又外向，我好快就同佢熟絡咗，經常一齊傾心事，舒緩我嘅壓力，佢仲教我同巴西代表行catwalk擺甫士，有日仲趁空餘時間孖住去游水減壓，玩得好開心。」

頴萱穿起純白泳衣登場，大騒32D、23、35葫蘆身材，谷出事業線相當誘人，加上夥同日本代表喺泳池嬉水，隨即吸引唔少艷羨目光，更有男士藉機上前「抄牌」，但佢哋今次一心備戰選美，所以就冇理會對方，唯有扮聽唔到，婉拒對方。

精選娛聞，喺晒《娛果》 http://fb.com/appledailyent