周日上演日乙升班附加賽決賽，名古屋鯨魚同福岡黃蜂喺中立場豐田球場決戰，兩隊喺90分鐘踢成0:0，但根據賽制喺法定時間和波係唔會進行加時或者互射12碼，而係由喺今季日乙排名較高嘅一隊升班，即係由排名第三嘅鯨魚，力壓第四嘅黃蜂來季重返日聯。

兩隊今仗都以強陣出擊，鯨魚鋒線有喺聯賽攻入18球嘅施莫域，黃蜂亦有入19球嘅威靈頓路爾斯。勝負關係到升班席位，但黃蜂一定要贏先可以升班，一定要爭取入球，威靈頓路爾斯喺下半場曾經成功將皮球送入網內，不過被判越位在先，慢鏡頭睇番呢個判決相當有爭議性。

鯨魚最終力保不失球，成功賽和黃蜂升班。鯨魚自1993年就一直喺日聯比賽，仲喺2010年贏過聯賽冠軍，到上屆球會史上首次降班日乙，相隔一年就重返頂級聯賽，來季會同日乙冠亞軍湘南比馬同長崎成功丸一齊升班日聯。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM