雷神莫雷拉今季以蔡約翰馬房主帥身份返港策騎，當然以波士馬匹為先，想外借搵食只能集中在五班賽事，因為蔡廐目前五班馬只得一匹「勁皇子」而已。而雷神近三次賽事於五班策騎四匹外線馬，取得兩冠一亞佳績，包括剛周三替處女馬「為善聚樂」打開勝門，成績甚佳。

今日(29日)兩場五班賽，雷神外借騎第二場高伯新的「心思熟慮」及第四場蘇保羅的「越跑越好」，其中「心思熟慮」休後復出，能跑番幾多真係靠估，況且高伯新是唯一在對上三季與雷神合作未贏過之練馬師，難言信心。

反而第四場五班1400米的「越跑越好」上仗跑谷草1200米雖落第，但遇上頗慢步速，該場末段時間為23秒2，比當晚四班及三班同程仲要快，此駒劣勢下可衝22秒79只輸三身位，結合形勢其實絕不差。

今仗「越跑越好」換上莫雷拉執韁，睇番他和蘇保羅近兩季在五班賽合作四次，勁取三冠一殿佳績，包括今季唯一合作馬「萬霸駒」亦在五班勝出，信數據當然要重視。