新鴻基地產（016）大股東兼兩位聯席主席郭炳江同郭炳聯上星期正式被廉署檢控，佢哋兩個仔臨危受命，分別幫阿爸做替代董事。外界對兩位公子所知有限，不過郭炳江囝囝郭基煇（Adam）因為曾經喺摩根士丹利工作過，所以投行中人對佢比較認識。
聽Adam喺大摩嘅舊同事講，雖然佢家庭背景猛料，但從來無牙斬斬，都係勤力做嘢嘅年輕人，佢同中信泰富（267）前主席榮智健細仔榮明棣（Andy）同期，06至07年喺大摩工作，可能大家都係富三代，當時特別老友。至於現年29歲嘅Adam乜嘢樣？舊同事叫華華幻想吓郭炳江後生嗰陣係點喎。
Adam喺大摩當然係學做刁，其中一單刁就係幫內房股合景泰富（1813）搞上市。當年新股市場同內房股都㷫烚烚，隻隻都話有大孖沙入飛認購，非常搶手。Adam有份做呢單刁，當然預埋老竇同世叔伯一份，郭炳江、恒地（012）主席李兆基都有認購。