中區甲級商廈巨無霸國際金融中心二期，出租率已經超過一半，減輕咗同區嘅租務壓力。市場當然有興趣想知有啲乜租客，蘭西喺土地註冊處搵到嘅資料，發現原來上市公司松日通訊控股係租客之一，租咗二十二樓全層，月租要八十三萬四千幾蚊，三年合約，以全層面積約二萬三千呎計，呎租約三十六個三，當然呢個只係面價，未計優惠啦。
另一上市公司森那美，承租三十五樓○一至二室，月租近十一萬二千蚊，租期五年。市場指面積約四千呎，呎租二十八蚊，呢單成交應該喺幾個月前傾妥。
另外，早前發展商高調講出嚟嘅大客，安永會計師事務所，租咗六層共十八萬呎，租期十一年，蘭西發現其中十五至十八樓，起租日係○五年五月一號，莫非之前嗰段期間係免租期？安永話單租務係喺沙士期間落實，唔知係咪因免租期有成年幾，係吸引佢哋咁爽手承租嘅原因呢？

北京東方新天地玩倒數
聖誕節有兩日假期，好多港人都出外盡情消費，輕鬆一吓。北京雖然唔係假期，但零售市道一樣咁旺，好似東方廣場嘅「東方新天地」，兩日每日都錄得超過二十萬人次，認真熱鬧。為咗迎接○四年來臨，呢個禮拜三會延長營業時間到凌晨一點，重舉行倒數活動。商場會抽出五名喺當日消費嘅顧客，參加超市「兩分鐘限時搶購比賽」，「搶購」總值最接近限定金額嘅，就可以將「搶到」嘅貨品全部拎返屋企。