日本禮拜二出戰世盃外，喺伊朗嘅中立場對伊拉克，「藍武士」雖靠大迫勇也上半場建功，但換邊後被追成1:1完場，日本仍排喺B組榜首。

世盃外亞洲區12強賽進入最後直路，B組係三雄爭霸嘅局面，日本、沙地阿拉伯同澳洲爭兩個直接出線席位。賽前，三隊同得16分而日本踢少一場。日本呢場派大迫勇也打正前鋒，原口元氣、久保裕也同埋本田圭佑踢攻中。八分鐘，大迫勇也接應本田圭佑的助攻開紀錄，日本半場領先1:0。不過，日本守唔到尾，喺72分鐘被伊拉克嘅追卡米爾射入，追成1:1。在補時五分鐘，日本有次界外球攻勢，可惜本田圭佑嘅射門被救到，球證亦隨之吹完場。日本和波後以17分排B組榜首，沙地同澳洲就同得16分緊隨其後。