韓國人氣男團EXO成員D.O.嘅新片《勁舞Dancing癲》(Swing Kids)，將於19號喺韓國公映，香港方面將於下月3日上映，由巴福斯影業發行。而D.O.今日就孖導演姜炯徹、女星朴惠秀及男星吳政世一齊出席於韓國舉行嘅記者會。

戲中D.O.跟朴惠秀有唔少對手戲，D.O.表示：「戲中有吻戲，但因為係摔倒後唔小心吻到，拍攝時摔得太用力，所以係處於牙痛嘅狀態，冇太大感受。」

而於新公開嘅預告中，當中跳舞場面令一眾觀眾睇得入神，為於大銀幕上重現踢躂舞嘅飛躍動感，工作人員及一眾演員於開拍前都花上大量時間準備，導演更特別請來知名舞蹈家李蘭英擔任舞蹈指導，李蘭英今次更用咗一年時間為《勁舞Dancing癲》編舞。完成編舞後，一眾演員亦開始接受為期六個月嘅密集踢躂舞訓練。

精選韓流，喺晒《娛果》
http://fb.com/appledailyent