擔遮都懶 AI帶來「雨傘革命」 撰文︰劉小黃

相傳中國春秋戰國時代已有人發明出雨傘，經過二千多年，除了材質和細微結構外，雨傘的外形和用法基本上也沒有進步過，人類總是要重覆「落雨擔遮」，問題是人類雙手越來越忙，又要打字又要影相又要俾like，如果一隻手要擔遮，你叫我點樣單手「食雞」？

人工智能幫到你。不是以後由AI幫你打機覆message，是由AI幫你擔遮。

日本栃木縣一間IT公司，正致力開發人工智能擔遮系統「free Parasol」；遮，仍然是一把遮，但就與四部無人機結合，變成一把「飛遮」，可持續飛行一個小時，最重要是，遮頂附有人工智能感應器，能夠控制無人機追蹤使用者，只要按按遮柄上的掣，無人機便會啟動開遮升空，沿途全自動幫你擋雨遮太陽。

該公司負責人表示，希望「飛遮」能為雨傘巿場帶來改革，並主要為殘障人士帶來方便，但公司仍要解決不少技術問題，例如氣流的影響，不然「飛遮」分分鐘變成「AI血滴子」。

「飛遮」預計在2019年中發售，售價約在3萬日圓左右，2000港紙買把遮貴唔貴？