【韓流】《和遊記》再有工作人員受傷 傳車勝元要求停拍
車勝元tvn和遊記
《和遊記》噚日再有工作人員受傷,有傳車勝元要求劇組停拍。
由李昇基、車勝元、吳漣序等人主演嘅tvN新劇《和遊記》上周六首播後是非不斷,除於第2集出現穿崩鏡頭外,日前被爆劇組涉隱瞞工作人員A某墮地受傷一事,韓國僱傭勞動部及警方亦介入調查。
而《和遊記》劇組噚日再次於拍攝現場發生意外,噚日一名音響部門嘅工作人員於休息期間跌落樓梯,工作人員立即前往醫院,確認韌帶受傷,接受治療後已返回拍攝場地。製作公司方面指是次意外係工作人員嘅失誤,不過韓國僱傭勞動部嘅負責人就表示工作人員於拍攝現場曾兩度差啲跌倒,從未見過咁危險嘅工作環境。
有傳因為先後有工作人員受傷,車勝元要求製作組停止拍攝,不過tvN就否認傳聞,表示:「今日暫停拍攝,係導演組跟製作組協商後決定。」tvN澄清劇組今日停止拍攝,係於噚日有工作人員受傷之前就已經決定嘅事,目的係為咗令所有工作人員暫時休息。
另外,有報道指《和遊記》嘅演員事前唔知道劇集停播一事,都係睇新聞先知。不過眾演員方面則指曾聽聞有停播嘅可能,直到今早已經被通知劇集會停播,所以唔會感到好驚訝,同時認為相比起通知演員劇集停播,先改善拍攝場地更重要。
更多韓流,喺晒《娛果》
http://fb.com/appledailyent
【minigame】2017瘋暈人物 返工打機唔使擇日
http://bit.ly/2CeWQkP