公民黨議員陳家洛前日炮轟死撐「網絡23條」嘅建制派議員，坐喺會議廳亦只係「軀殼在，靈魂不在」，令工程界議員「盧博士」盧偉國谷住道氣。
噚日盧博士借立法會發言時候，話聽完陳家洛講呢番說話後，「有如骨鯁在喉，不吐不快」，反問唔在席嘅泛民議員「是否軀殼不在，靈魂在？」仲建議立法會主席曾鈺成下次點人數時，「要點埋泛民靈魂」，咁就一定夠法定人數喎。
建制派議員聽到盧博士呢番「騎呢」偉論，好多人都偷笑，唯獨曾主席聽完就笑唔出，仲黑口黑面話不能採納盧偉國點算人數方法，仲好認真講佢知，離開咗軀殼嘅靈魂「只會係鬼魂」，「本會點算法定人數呢，係只算活人，不算鬼魂嘅。」

麥美娟亂call小鳳姐

除咗盧博士夠出位，平日甚少發言的工聯會麥美娟，噚日亦罕有開腔抽水，鬧泛民純粹因為網上群情洶湧，先轉軚反「網絡23條」，批評泛民做事唔應該咁「小學雞」︰「使唔使我幫你叫小鳳姐出場？」
眼見建制派大派花生，噚日提出「中止待續」動議拉布的獨立議員黃毓民都話十分欣賞，仲笑十個發言嘅建制派議員令辯論過程「花生味十足、火花四濺」，特別點名讚麥美娟，指麥噚日發言長達十分鐘，「我鍾意麥美娟多過王國興，因為王國興喊打喊殺咁多年，但都係講嗰啲嘢，唔該（王國興）換吓個方式表達啦！」

李八方
mailto:[email protected]