下星期一，會考放榜。會考制度，高官長年唱好，之但係，好多高官自己嘅小朋友都去外國留學。高官精心炮製出嚟嘅教育制度，高官用腳投票，帶頭杯葛本地教育制度，結果最唔支持香港教育嘅，竟然係高官自己，實在諷刺。難怪特府嘅教育改革，長年以嚟都飽受批評。咁啱早排曾特首成日講「透明度」，《蘋果批》覺得曾特首可以將呢個諗法，套用喺教育之上……撰文：高明輝

據報道，曾特首嘅兩位公子，13歲初中時就被送去前宗主國讀書，毋須考香港會考。雖然曾特首仔女都係喺殖民地時代去留學，但係就連香港最高領導都帶頭杯葛本地教育制度，好難唔令人聯想到其他高官都會跟。
而事實上，過去唔少報道都指，唔少先後主理過教育嘅高官，佢哋嘅仔女唔喺香港讀書，亦避過會考高考。

曾特首大肆開啓「高透明度」宣傳機器，油價要「高透明度」，超市又要「格價」。
既然曾特首咁鍾情「透明度」，趁住會考放榜，好應該提升高官子女留學紀錄嘅「透明度」，等所有會考生知道，有份設計及經營呢個制度出嚟嘅人會點揀？

點樣實現「高透明度」？早排政府成功推出食品「強制營養標籤」，《蘋果批》覺得呢個做法，應該應用喺高官身上，推出「高官子女留學標籤」，以後再有高官走出嚟大讚本地教育幾好幾好，一個「通識」嘅會考生一定會問：「咁點解你送你囡囡去前宗主國讀中學？唔留佢喺香港考會考？」

當然，《蘋果批》明白到，「留學標籤」，只可以令學生知道高官點揀，而唔能夠真正幫助學生。
如果香港嘅教育政策真係咁「公平公正」，反正政府都有資助教育，倒不如直接資助學生，令一般學生都可以好似高官咁，有機會出國讀書，選擇一個更能反映自己能力嘅制度，唔需要留喺一個連設計者、經營者都帶頭杯葛嘅制度之下，家長真正享有更高教育透明度。

下星期一，《蘋果批》請來今屆立法會港島區候選人「阿牛」曾健成及勞永樂醫生，接受讀者的提問。有興趣的讀者，請預先將問題電郵給我們，我們會代你質詢。