中環滙豐總行，竟然成為過江老千搵食舞台。中環老友噚日講咗單笑料畀八方聽，話說近月有兩個肥瘦鬼佬，自稱係英國滙豐前高層，以搞fund為名，搵人搭路接觸香港富豪或富豪身邊人。
老友日前以陪客身份，見過呢兩個鬼佬。兩個鬼佬指定約喺滙豐總行見面，但要喺六樓等齊人先上樓慢慢傾。鬼佬言行有紋有路，吹水一輪，其中一人忽然話：其實基金啲嘢可以慢慢傾，眼前有單筍嘢，有冇興趣？
所謂筍嘢，就係大陸有筆巨款想滙嚟香港，但正途手續多，因此想借戶口一用，筆錢嚟到，自當奉上可觀「佣金」。呢啲「橋」又殘又舊，老友話聽到呢度，已經準備起身講goodbye，幸好佢動作慢，否則就錯過戲肉。
個瘦鬼忽然細細聲好神秘咁話，呢單筍嘢其實李嘉誠基金會有份o架！老友話聽到呢句話，真係忍唔住笑咗出嚟，事關對面馬路長江中心七樓就係首富基金會總部，呢兩個鬼佬搵食唔知碇成咁，點可以忍住唔笑呢。
而約喺滙豐總行六樓等，實情嗰度係中小企中心，人人都上得去，鬼佬諗住有個「實景」，入戲啲咁啫。