噚日陸叔個派對，除咗馬仔同稀客鄺其志外，金至尊林世榮、富豪國際羅寶文、新地周國賢、鷹君李澄明、扒王李德麟、長實趙國雄、滙豐保險蔡中虎，有線趙應春、新城郭艷明，同埋娛樂圈嘅方力申、馮寶寶等百幾二百個賓客，都有到場賀陸叔。
主人家陸叔5點未夠，就在場四圍騰迎賓，有幾個着到鬼咁性感嘅女賓，一見到陸叔就攬住佢唔放，俾華華笑佢艷福不淺，陸叔即刻好緊張咁話：「千祈唔好咁講呀！」唔知係咪怕老婆呷醋呢？佢又話估唔到個節目可以做咁耐，又話仲咁後生，冇諗過退休，希望一路做落去。
馬仔都好識做，喺台上讚陸叔係股海明燈，分析好持平，馬仔日日食完晏就會扭開收音機，聽對方嘅節目，又話個節目應該做「6年又6年再6年」，𠱁得陸叔鬼咁開心。