警隊近年嘅形象一落千丈，問起市民對警隊評價都多數都係負面，但今日「2017年公務員優質服務獎勵計劃」頒獎典禮，警隊竟然一洗頹氣，連奪11個獎，成為公務員團隊中最犀利嘅部門，消防處都只係攞到8個獎乍。

不過喺最佳公眾形象獎方面，警務處只係屈居第二，一向形象好正面嘅消防，順理成章攞金獎，至於銅獎就係天文台。警務處其他獎項有啲都幾特別，例如「隊伍獎（一般公共服務）特別嘉許（積極回應）」，由警隊社交媒體傳訊組攞到，唔通係表揚佢哋活躍喺fb？

公民黨立法會議員譚文豪係頒獎典禮嘅主禮嘉賓，佢喺fb都忍唔住出post，特別讚消防處攞到最佳公眾形象金獎，係由兩位前線隊目去領獎，而唔係處長去領功，激讚消防處實至名歸，仲意有所指喺hashtag話「#金獎一定無做馬」。

公務員事務局局長羅智光致辭時話，相信好多市民喺近期颱風襲港期間，都體會到公務員無懼風雨，時刻緊守崗位，無論喺抗災防備、緊急救援，或者善後處理上，都非常專業同可靠。而特首林鄭月娥都有係典禮上讚同祝賀各得獎部門和隊伍。