葉凱茵同老公開嘅眼鏡店Pops Optic今日喺旺角開幕，一班好友喬寶寶、林淑敏、李漫芬同李天翔等撐場。凱茵早年曾經開美容網店，今次第一次開實體店做老闆娘，佢好興奮咁話：「好開心、緊張又興奮，因為老公係做眼鏡出口，今次自己做返，投資咗過百萬，已經試業咗一星期，反應非常好，o依家已經籌備緊第二間店，希望兩年開到10間。」問到會唔會減少拍劇專心做生意？凱茵話：「應該唔會嘞，因為啱啱加簽咗幾年藝員合約，囝囝一年級，其實都有少少壓力，因為功課開始多，暫時都想自己教番，希望多啲時間同佢相處，生意盡量交畀老公。」

另外，喺7月入紙結婚嘅李天翔，被問到婚禮籌備如何？天翔聲稱乜都冇準備，居然唔記得自己幾時入紙，亦都冇為結婚請假，佢話：「我都唔記得幾時入紙！o依家忙緊拍緊劇，拍到10月，完咗先諗，不過都唔會大搞，雙方家人都想低調，乜都唔敢諗住，入咗紙，落咗訂先。」