由韓國影帝宋康昊夥拍劉海鎮、柳俊烈及外國男星湯瑪士基斯曼（Thomas Kretschmann）主演嘅韓片《逆權司機》將於周四喺香港上映，電影上月於韓國開畫後贏盡口碑，引起網民熱烈討論，當中宋康昊嘅的士車牌號碼亦成為討論對象，被指有特別隱喻。

電影中，宋康昊嘅的士換過車牌，當佢第一次準備離開光州前，劉海鎮特地畀咗新嘅車牌佢，當中車牌號碼係「0310」，令觀眾不禁聯想到朴槿惠彈劾案。

《逆權司機》係去年開拍嘅，而去年底南韓前總統朴槿惠被爆容許閨密崔順實干政，大批市民參與集會要求朴槿惠下台，最終韓國憲法法院於今年3月10日通過朴槿惠嘅彈劾議案，朴槿惠亦成為韓國憲政史上首位被彈劾成功及罷免嘅總統。

另外，宋康昊因曾抗議政府處理「世越號」沉船事件失當，被朴槿惠政府列入封殺名單，種種巧合，令觀眾更加相信「0310」係導演或劇組嘅刻意安排。