丹尼爾做和事佬 卡雲尼信你至奇
蘋果日報 2017/09/19 05:32
里昂巴黎聖日耳門法甲PSG丹尼爾尼馬卡雲尼歐洲足球
法甲嘅巴黎聖日耳門（PSG）日前喺聯賽贏里昂兩粒，期間爆出卡雲尼同埋尼馬爭射罰球同12碼嘅鬧劇，同尼馬係同鄉嘅後衛丹尼爾就畀電視鏡頭影到疑似偏幫自己友，單擋卡雲尼再將個波遞畀尼馬。不過，呢位巴西後衛就話事情根本唔係咁喎，仲諗住做和事佬！
丹尼爾話自己拎住個波果陣，係諗住自己去射罰球，點知唔夠尼馬爭，直情講到自己都係受害人一樣：「其實件事無乜大不了，場波好緊湊，大家都係想幫隊波出力啫。我都想射罰球㗎，不過唔好彩畀尼馬搶咗我個波咋嘛。我相信個人統計唔重要嘅，最重要係大家團結一致啫，球隊嘅成績點都係重要啲嘅。」
丹尼爾話自己唔係偏幫尼馬嘅連環電視截圖，buy唔buy佢果套就大家自行判斷喇。