前日民主黨俾政務司司長曾蔭權喺立法會出言侮辱,睇都唔睇就話佢哋嘅施政建議會令政府破產,雖然主席楊森即時反駁,但一班白鴿黨黨員愈諗愈㷫,噚日開記者會,強烈要求煲呔收回有關言論,重要喺立法會公開道歉。
楊森話,有唔同意見唔緊要,但最重要係有根有據,民主黨早前同財爺會面,提出同樣嘅施政建議,財爺聽咗佢哋解釋個幾鐘,都冇話啲建議會令政府破產,反而煲呔未睇清楚就大肆批評,其實民主黨建議中有關開源嘅建議涉及四百億,花錢嘅建議反少於一百億,何來破產之說?
副主席何俊仁笑住話,佢就真係擔心政府會破產,因為煲呔咁大花筒,金口一開話西九文娛藝術區要有天篷,庫房就會冇咗幾十億嚟起天篷,楊森估計煲呔近排遭各方批評九西計劃,尤其係民主黨,所以借機還拖。李永達笑說,近排見煲呔面上多咗好多暗瘡,明顯佢係心火盛。曾蔭權辦公室發言人回應話,司長當日重點係話會考慮議員嘅建議,別無他意,大家唔好誤會。
(圖)八方前日喺立法會見到煲呔,但就唔係好覺佢有冇生暗瘡。
傳真︰2623-9278
電郵︰
[email protected]