今年44歲嘅海俊傑上年7月出席活動時，表示同拍拖三年嘅化妝師女友Effie求咗婚，當時仲預告好快拉埋天窗。噚日（3月1 日）佢哋喺香港時間早上7點半，喺澳洲墨爾本一間教堂舉行婚禮。Effie仲喺fb貼出同海俊傑喺墨爾本影嘅婚紗相，Effie留言：「I Do！」

海俊傑同Effie雖然只係貼得兩張相上fb，不過完全感受到兩人好Sweet！兩人深情對望，手持花球相擁，面上掛上甜絲絲嘅笑容。

海俊傑晚上接受《蘋果》電話訪問，講到噚日婚禮情況，佢話好感動好開心。有冇講咩感動說話o氹老婆？佢笑住話：「感動說話唔係我講，係個神父講，我哋兩公婆都眼濕濕。」不過佢話呢啲係開心嘅眼淚，又笑住話喺呢啲場面好難唔喊。

問到點解揀於澳洲結婚？佢話：「杜平叔係我Uncle，佢喺呢度搞咗個慈善音樂會，佢知我準備結婚，之前提意我嚟呢度蜜月旅行，話可以坐下馬車，周圍影下相，結果我唔等蜜月，直頭就喺呢度註埋冊。」

海俊傑又話，今次結婚之旅會逗留10日，今日喺教堂行完禮都周圍影相，聽日都會繼續影。之前佢講過會喺香港補擺酒，佢話：「會呀！但4月會先喺北京擺咗先，都係請啲好熟嘅朋友，大約8-9圍，9月份再喺香港擺，預計擺30圍左右，都係大班朋友開心下。」

問到海俊傑有冇「造人」大計？佢即刻話：「有呀！但要問咗我大佬先，我大佬好大架，佢喺個天度，就係耶穌，交俾佢決定啦！佢同我決定咗第一步，第二第三步都交俾佢，o依家最緊要做好工作，做好自己先。」