神奇小子曹星如星期六晚同前日本拳王河野公平對決,睇到台下唔少政商界名人好肉緊,最終打到眼都腫,險勝續保不敗紀錄,自然令港人興奮莫名,有份入場嘅民建聯立法會議員葛珮帆(EQ)甚至喺賽後同對方合照,仲引述對方話「左眼好痛好痛但堅持打落去」,點知抽水抽着火水,網民鬧佢阻延星如求醫,狂畀嬲嬲豬。
呢場賽事曹星如陷苦戰,初段已經受傷,最終以點數獲勝後送院驗傷。大家睇到佢額頭腫過隻蛋,梗係接受治療最重要,點知到場捧場期間喺facebook做直播嘅EQ,好唔識趣,賽後仲到後台同對方合照,又引述對方話,「左眼好痛好痛但堅持打落去,結果醫生認為不能再繼續比賽,提早結束為止。香港精神永不放棄!!星如現在會去醫院診治」。