葛斯返嚟啦！多蒙特中場馬里奧葛斯今年2月因為患上代謝失調提早收「咧」，喺佢養病期間，唔少狗仔隊影到佢同靚靚女友Ann-Kathrin Brommel出街時，全身肥腫兼有小肚腩，令球迷好擔心呢位2014年世界盃決賽踢到加時一箭定江山嘅25歲「金童」，自此緣盡綠茵場。

不過，經過4個月養好身子兼喺社交網站「消失」，葛斯周五終於喺instagram上載一張緩步跑相片，見身穿背心嘅佢兩臂有番肌肉，肚腩仔亦幾乎消失晒，絕對係德國同多蒙特球迷嘅喜訊！球會體育總監索克亦表示，葛斯嘅治療取得進展，下一步係希望佢可以循序漸進復操。