身在北京的特首林鄭月娥噚日列席人大開幕後，今日開始走訪不同機構，好似今朝佢就特別參觀國家行政學院，並同學院領導會面，為施政報告提出要設立嘅公務員學院取經。娥特致辭時爆料，話已經大致為學院搵到合適地方，課程中會包括注重「加深公務員對國家發展和中央與特區關係的認識」，希望呢次參觀有助公務員學院計劃，而學院未來會開放畀對公共行政有興趣嘅人。

國家行政學院常務副院長馬建堂就話呀，政務司司長張建宗同公務員事務局局長羅智光，去年已經到訪過國家行政學院，探討開設公務員學院嘅事，佢拍心口話呀，如果香港喺籌備公務員學院時有需要，佢哋會義不容辭協助。

而林鄭就算在京亦同中聯辦主任王志民行埋，噚日孖住出席香港各界青少年活動委員會舉辦嘅座談會，了解港青喺內地學習同發展嘅經驗。