15年前一場沙士疫症，於香港共奪去299人性命，其中更有六名醫護人員殉職。屯門醫院護士劉永佳是本港首位因對抗非典型肺炎而殉職的醫護人員，終年38歲。他在染病前，一直在屯門醫院A五病房工作。當他得悉有三名病人受到感染時，決定與謝婉雯醫生等醫護到深切治療部參與搶救，其間受感染，至4月26日辭世。未及一個月，謝婉雯醫生亦因受感染，不幸殉職，終年35歲。

謝醫生的故事，觸動了很多人，也觸動了導演關信輝。翌年他找來蔡少芬飾演謝醫生的角色，拍成電影《天作之盒》，紀念這位香港的女兒。

日前關信輝導演接受《蘋果》訪問，重提當日聽到謝醫生死訊時，仍忍不住灑淚：「當時我做緊電影《雙雄》嘅編劇，全香港市民都唔係好敢出街，我哋做電影嘅，就日日都要出去拍嘢。正當我喺車上等候拍攝嘅時候，就聽到呢個消息，我真係忍唔住喊咗出嚟。我哋拍嘅係英雄電影，原來呢個世界真係有英雄，我同自己講，無論如何，一定要將呢個故事拍出嚟。」一年後，以謝婉雯醫生為藍本的電影《天作之盒》面世。

關導演直言，希望用電影去記錄這個故事，目的不是要找出歷史過失，因此沙士的劇情所佔篇幅不多。關導演是希望，透過這部作品，還原「謝婉雯」的一生。英雄背後，其實跟普通人一樣。

謝醫生的丈夫也是醫生，在沙士之前因血癌離世，關導演說：「我做資料搜集嗰陣，好記得謝婉雯嘅醫生丈夫喺血癌復發時，曾經同佢講咗一句：『上天留你喺世上，梗係要做一啲事』佢先生要離開，好似將功力傳授咗俾謝醫生，留俾佢一個使命，叫佢唔好放棄，唔好氣餒。點知就係因為呢句說話，令謝醫生有勇氣去戰鬥。

「生命長短有時好難去度，但謝婉雯醫生嘅影響力好大，佢唔係代表一個人，而係代表住一班醫護人員嘅英雄故事。」

當年因為醫護設備不足，香港陷入恐慌之中，每一日都像在打仗，8A病房、N95口罩、1:99漂白水這些字眼人人掛在嘴邊。關導演認為，如今香港人的衛生常識有所提高的：「沙士之前，啲人戴口罩都會俾人當係怪物，依家好平常，有病就唔好返工返學、要洗手呀咁，呢啲都係進步，當然我哋亦唔可以忘記教訓。」

15年過去，這一代人因為沙士，帶來了一個「共同回憶」，雖然一些悲劇發生了，但當時都能跨過去，今天都終必跨過，關導演說：「回望沙士，縱使有黑暗，人性嘅光輝，係可以一齊照亮黑暗歲月。我希望透過電影、影象，將謝婉雯嘅故事延續開去，俾更多人紀念呢個不死嘅精神。

「有危機嘅時候，就有英雄出現，唔係佢哋有超能力、或者有過人之長，而係可以喺逆境之中帶俾人希望嘅，就係英雄。」

如果謝婉雯醫生仍然在世，關導演相信若然面對近日的流感疫情，或者其他疾病，謝婉雯醫生仍然會當仁不讓，必定會第一個衝向危險：「當時第二啲國家嘅醫生，聽到沙士即刻爬窗走，惟獨香港嘅醫護人員留低，留守崗位就帶到別人希望。連醫生都逃走嘅時候，呢個世界就玩完。」

採訪：張俊銘
攝影：仇志德
場地提供：The One L19 Harlars

《蘋果》沙士15周年系列網站，正式登場：
https://hk.feature.appledaily.com/sars15/