消費BestBuy:掃平貨做善事
買一折歐洲名牌捐助蘋果慈善基金
噚日預告過今明兩日會有個特價場現身銅鑼灣,七千呎場除咗有各種名牌童裝之外,重有大量歐洲名牌禦寒服裝同皮具,好似巴黎世家、林寶堅尼、courreges、Polo、CalvinKlien、TommyHilfiger等,全部以一折起嘅超筍價發售,負責人更會將今次開倉所得收益嘅百分之二十五捐畀血病患者同蘋果日報慈善基金,客人可以掃平貨過冬之餘又可以做埋善事,一舉兩得!
記者:黃婉冰
攝影:楊錦文ImageGirl:Doris
冬天之寶羽絨褸
Polo雙面羽絨褸
原價:$1,890
義賣價:$199(限量200件)
要數全場至筍,呢件Polo薄身雙面羽絨褸會係首選,外層用上跣水質料,全件褸用上九成羽絨,只得一成係Fur,衫身夠薄夠輕盈,加上雙面設計,反轉又可以多一隻顏色襯衫,是必掃首選。有四種顏色兼齊碼,但只得200件,當然又係手快有,手慢無。
courreges雙面羽絨褸
原價:$1,280
義賣價:$399
除Polo外,另有同樣走年輕路線嘅法國品牌courreges,其雙面羽絨褸款式更多,有以粉色為主,亦有撞色系列,好似呢件用橙撞淺灰,Sharp得來唔誇張單調,另有拆袖、有帽、背心款式,想買到心水款式就要慢慢揀啦。
巴黎世家雙面羽絨背心
原價:$980
義賣價:$199
今次特賣場淨係羽絨褸都有幾個品牌,連法國名牌巴黎世家都有,相對Polo同courreges,呢件羽絨背心較厚,摸上手質地都幾舒服,近千蚊減到二百蚊有找,款式中性,男女都合適。
各款名牌冬褸照減
林寶堅尼女裝皮褸
原價:$2,980
義賣價:$999
每年冬季,皮褸都係女士們必買Item,一講到皮褸,當然以真皮為首選,好似林寶堅尼呢款短皮褸,成件用羊仔皮造成,質地舒服軟滑,嫌白色難襯,重有黑、啡同中褸及其他款選擇。
巴黎世家男裝皮褸
原價:$3,980
義賣價:$1,080
拉鏈款短身皮褸襯牛仔褲就最啱,一樣係軟熟羊仔皮,Casual又唔會老土,想斯文另有扣鈕款,襯西裝,斯文又大方,件件都係$1,080。
巴黎世家雙層絨面中褸
原價:$1,280
義賣價:$598
絨面中褸其實另有乾坤,內裏重有一層絨布內膽,拉鏈設計,方便將內膽隨時拆走或加上,衫身唔會太厚,適合香港唔太凍嘅天氣。
限量意大利入口皮褸
原價:$3,880
義賣價:$500(男女裝共50件)
唔追求名牌子,重有更筍之選,呢幾款都係由意大利同西班直接入口嘅真皮皮褸,男女款式都有,有多種特別嘅顏色任揀,但男、女裝加埋都只得50件,買唔買到就要睇彩數!
冷衫抓毛$79買到件
courreges圓領純羊毛冷衫
原價:$428
義賣價:$79
courregesFans,買完羽絨之後記得掃番幾件冷衫,同樣有不同的淺粉色選擇,唔鍾意大Logo可以揀呢款淨色圓領款,羊毛質料摸落滑手唔拮肉,咁平可以買多幾隻顏色襯衫。
林寶堅尼抓毛過頭笠
原價:$438
義賣價:$79
林寶堅尼呢件抓毛過頭笠外套,拉鏈款式夠晒Casual容易襯衫,有多種顏色任你揀,但貨量唔多,有心買就請早。
全場皮具$80起
(右)林寶堅尼真皮旅行袋
原價:$1,780
義賣價:$550
(左)林寶堅尼真皮公事包
原價:$1,480
義賣價:$500
皮具都係特賣場主打之一,各款巴黎世家真皮皮帶一律$80有交易,林寶堅尼皮具好似旅行袋、公事包同銀包禮盒全部以低於半價發售,買嚟送畀人得體唔失禮。
查詢電話:29703336
地址:銅鑼灣羅素街38號金朝陽中心11樓
義賣日期:11月9、10日上午10時到晚上10時。
備註:客人凡購買羽絨褸一件,均可獲贈該牌子羽絨袋一個,送完即止。
義賣捐給血病患者及蘋果基金
今次特賣場負責人會將兩日義賣所得款項中的百分之二十五捐給蘋果日報慈善基金,當中一半款項將會透過蘋果基金轉送給有需要的血病患者,另一半則會用作其他慈善用途。
蘋果日報慈善基金成立於1996年,宗旨是藉着傳播介作橋樑,為社會上有需要的人士獻上讀者的關懷和支持,一直以來,蘋果基金所籌得的善款會分別用作幫助弱勢社群及資助社會服務、教育活動等用途,令社會上更多急需援助的人受惠。