曾演日劇《半澤直樹》嘅著名艷星壇蜜，向來以風騷形象深得男士歡迎，最近有傳佢同37歲作家又吉直樹發展新戀情，被當地傳媒大造文章。

36歲嘅壇蜜曾經同福山雅治傳出緋聞，但隨住福山已成為人夫，壇蜜被指搭上諧星出身嘅作家又吉直樹，其實二人多次因工作而交手，日前更獲雜誌《週刊新潮》安排以訪問形式對談，繼而傳出秘密撻着。

壇蜜今日亮相TBS資訊節目，佢一臉無奈否認戀情，仲自言：「我哋連聯絡方法都冇。」不過同場嘅拍檔都大讚二人合襯。