出爐百想視帝孔劉噚日襲港後，今日晏晝喺下榻酒店舉行記者會，聽晚喺亞博館舉行粉絲見面會。

雖然今日記者會冇安排粉絲入場，但現場唔少記者都係孔劉粉絲，當孔劉以白馬王子look現身後，現場部分媒體就用韓文高呼「大叔」，搞到孔劉怕醜喺台上傻笑。

而孔劉工作態度一向認真，喺記者會上佢亦繼續專業，特別喺回答主持人森美嘅提問時都例必經過深思熟慮，絕不hea答。

雖然今次來港係工作，但孔劉心情都好好，雖然佢喺現場冇冧傳媒，想叫佢派心佢都好怕醜，其間男神都冇乜小動作，只係間唔中摸吓鼻，整個記者會喺融洽嘅氣氛下順利結束。

另外，孔劉完成記者會後，都有留喺酒店同海外傳媒做訪問，佢仲先後換咗四套衫，佢事務所方面有喺網上公開現場相片，可見孔劉唔似其他韓星一樣，一套衫做多間傳媒採訪，而係換多套靚衫配合傳媒。