皇家馬德里歷史性衞冕歐聯，今季仲從巴塞隆拿手中搶埋西甲冠軍，教練施丹功不可沒；貴為球壇出名愛妻號嘅佢，就算有一個成功球季，休季都係要陪吓老婆。施丹就喺個人Twitter發放同老婆Véronique喺意大利度假嘅相，仲留言：「Relaxing in Italy」（喺意大利放鬆）添。

不過皇馬今夏都應該喺轉會市場好多動作，好似前鋒艾華路莫拉達、中場占士洛迪古斯等勢離隊，又要繼續向曼聯傾收購門將迪基亞事宜，所以施丹都要好好享受呢幾日假期，之後就有排忙嘞。