許志安噚晚繼續於紅館舉行第三場演唱會，安仔出場後有感而發咁話：「好多謝大家成全許志安喺台上繼續開騷，希望大家可以玩得開心啲！」操到周身肌肉嘅安仔，身穿黑色透視衫褲唱咗一輪勁歌後，終於除咗上衣，半裸喺台上跳勁舞，惹來全場歡呼。

擔任嘉賓嘅衞蘭同安仔合唱《會過去的》，安仔笑言：「我都好鍾意你講嘢嘅style，好sweet，每次傾偈都會好專心睇佢嘴唇，因為佢講嘢好細聲！」另一位嘉賓係人妻謝安琪（Kay），兩人手拖手合唱《教我如何可以不愛他》，Kay笑言：「我會叫你做冧志安，因為每次聽完啲歌都好想拍拖，今晚我返去會叫張繼聰再追過我！結咗婚係咁，間唔中要有啲花款！」人夫安仔笑說：「O依家即係你教我呀？」全場起哄兼有人大叫Sammi。