煲呔個修頓球場造勢晚會東施效顰，搵咗班可以上TVB嘅歌星站台，但就請咗麗的時代明星劉志榮做司儀，勁有ATV台慶feel，珠三角觀眾肯定唔捨得轉台，八方冇乜興趣，反而去場外睇戲好過。長毛今勻班齊馬抬紅棺材加紙紮煲呔鴨贈興，佢經驗豐富，一開波唔搶攻，由一班關注舊區重建戶打頭陣。

「天星女鬥士」何來最勇，爬上牆用大聲公指摘煲呔為政不仁，煲呔手下初時用帆布封住球場大閘同鐵絲網，以為可以隔音，見唔使得就有樣學樣，開行大聲公播「嗚嗚」聲反擊，雙方大鬥「音波功」，噪音爆錶，嘈到以為有白車到場，場內歌星唱乜都聽唔到。
擾攘咗一輪，長毛同古思堯等人終於出動，佢哋抬起棺材想衝入會場，大班警員、保安全力阻止，衝咗一輪長毛等人放低棺材，扮放棄舉手投降，轉頭就同阿古分頭行動，三扒兩撥爬牆就擒咗入球場，仲成功「抵壘」去到觀眾席。長毛話如果衝到上台，就會搶咪大嗌「小圈子選舉可恥」，不過佢同阿古去到觀眾席就俾人熊抱抽水趕返出去，佢心明已經「做好呢場騷」，見好就收，離場扯煙去也。