隔牆有耳:
事頭婆愛駒勾起集體回憶 - 李八方

蘋果日報 2012/12/10 00:00


噚日係一年一度香港國際賽嘅大日子,有好多唔係馬迷嘅朋友今年都會留意呢項賽事,事關贊助商除咗請郭富城同琦溫絲莉做頒獎嘉賓之外,喺馬場上仲奏起咗英國國歌《God Save The Queen》,之後又有前事頭婆英女皇隻愛駒「嘉登行宮」(Carlton House)出場,令到唔少馬迷掌聲如雷,勾起親英集體回憶。
empty
夏佳理(右)嘅愛駒「紅色禮物」爆十倍半冷勝出,佢同太太(右二)一個興奮,一個冷靜。譚日華攝
empty
夏佳理(左)捧盃,現場奏起英國國歌,好多馬迷都拍手歡呼。
夏佳理馬仔爆冷勝出
噚日四場國際賽,其中一場香港瓶,由馬會前主席夏佳理名下嘅「紅色禮物」爆十倍半冷勝出,之但係呢隻「紅色禮物」並唔係以香港代表身份出戰,而係以英國代表身份參賽。由於佢係英國代表,所以頒獎禮後銀樂隊奏起咗已經冇聽好耐嘅英國國歌《God Save The Queen》,所以現場有好多馬迷報以一片歡呼聲,簡直就係另一種香港人嘅集體回憶。唔知陳佐洱見到呢一幕,會唔會覺得心痛,又或者嬲到老屈馬迷搞港獨呢?
到咗第八場戲肉香港盃就更加精采,因為英女皇隻愛駒「嘉登行宮」有份出戰,如果贏嘅話就精采咯!點解?事關呢場嘅頒獎嘉賓係特首狼振英。若果「嘉登行宮」跑出,咁到時就會由狼振英頒獎畀事頭婆嘅愛駒,仲要齊齊企響頒獎台上聽英國國歌㖭呀,真係諗起都覺得好精采!
可惜「嘉登行宮」只跑第六,在場馬迷冇機會親眼目睹喺狼振英面前奏起英國國歌呢一幕嘞!不過英女皇都有番三十萬獎金落袋!
mailto:[email protected]
empty
英女皇愛駒「嘉登行宮」騎師身穿嘅綵衣,只供策騎皇室馬匹嘅人專用。