【新增內容】

賣座韓片《與神同行》嘅49歲男星吳達洙，早前被爆涉性騷擾，話劇女演員嚴智英更上電視受訪指控吳達洙嘅性騷擾行為，原本否認性醜聞嘅吳達洙最終發聲明道歉。業界亦因吳達洙嘅性醜聞而有損失，據悉起碼3齣電影可能要重拍。

而分上、下集上映嘅《與神同行》，《與神同行2》亦預計於今年夏天上映，電影公司正進行後期工作，不過因為吳達洙有份演出，片商都好慎重處理其戲份。吳達洙喺片中飾演判官，雖然戲份唔重，但其登場都會帶動到情節，電影公司最終喺噚晚發表立場，表示會將吳達洙嘅所有戲份刪走，並會重新拍攝其演出嘅片段，不過仍未決定由邊位演員代替吳達洙。

另外，據韓媒《STARNEWS》報道，日前自爆涉性騷擾嘅韓劇《咖啡王子》58歲男星崔日和，原來亦有份喺《與神同行2》登場。而製作公司表示，同樣會將崔日和嘅戲份刪走以及搵演員取代演出，同時亦要重拍相關嘅場面。

更多韓流，喺晒《娛果》
http://fb.com/appledailyent