花旗股市連升3日之後喺阻力位前止步，不過調整幅度溫和，暫時當整固睇。
利比亞局勢係油市嘅焦點，但牽動全球金融市場嘅仍然係日本核危機，噚日日股回吐亦係受相關消息影響。家日本核危機仲有好多變數，金融市場會繼續大幅波動。港股噚日下跌32點，報收22825，低位承接力都幾好，成交縮咗，唔夠700億元，如果要再炒上睇嚟都係要靠內銀股，要繼續睇實。
友邦C輪27214：友邦保險（1299）噚日報收23.50元，升1.7%，股價早排回復強勢，上試過24元關，可惜遇上大市回落，友邦亦回試50日線，近日喺23元水平整固後，噚日再見動作，以大成交炒上，相信攻破24元嘅機會好大，上望25元，可以諗吓隻C輪27214。隻輪現價9.9仙，2011年8月2日到期，行使價25元，溢價10.6%，引伸波幅27.7%，實際槓桿9.3倍，正股升上25元，27214睇16.9仙，升幅有7成，正股跌穿22.9元就沽咗隻輪。
俊樺