期指在11月初挑戰25000不果後，一直下跌，跌至22755才回升，但反彈至23600已經乏力，之後一直在23000水平橫行上落，到前日大市突然下挫，驟眼睇係因為西班牙評級或被下調，但歐美股市並無大跌，大家應已感到港股有點不對路。所謂久守必失，22755的關鍵位最終都守唔住，筆者昨日亦已按計劃沽空期指，對冲手上股票持貨。
讀者或會奇怪，士佳明明長遠看好大市，為何跌下來卻不撈貨，反而沽空對冲呢？
主要係因為好多基金經理見大市調整了不少，22755應該唔會穿，稍為微調持倉水平便去放假，今次一跌，殺他們一個措手不及，可能引致部份基金沽貨，將持倉調整至更安全的水平，所以我認為調整會再深一點。

挨近250日線才入貨

而且幾個最近一直困擾市場的因素，如歐豬債務問題、美國復蘇疲弱、內地加息憂慮等已逐漸穩定下來，其實都反映市場偏向正面，投資者理應惜貨，不會貿然大手沽出。應不跌而跌，幅度自然難免會比一般預計的多，所以士佳寧吼低擇肥而噬，也不貿然接刀。
現階段士佳會碰碰運氣，當大市稍為反彈便會減持部份走勢轉弱的個股，將持倉水平變為負數，因為好多時大市跌穿關鍵位後會先彈一彈，引人入場後才再作最後震倉。翻看往日線圖，2004至2007年間都曾出現數次類似情況，自己會待期指挨近250日線，才將持倉水平轉為正數。
大市之後會唔會如上述所講般走，筆者手中沒有水晶球，無法得知，不過以上就是自己暫時的藍圖，除非大市升穿24000，到時才會修訂睇法。昨日大市跌幅雖然不小，但未見恐慌，下跌得甚有秩序，而且好多股票跌得唔算多，因此估計反彈很快會出現，不過相信都係假彈居多。

張士佳
寶來證券（香港）董事　投資服務部
mailto:[email protected]