牛雜妹李亦喬遇「野蠻」業主 為馬桶銹漬、地下狗毛要求扣按金
蘋果日報 2020/12/24 15:23
李亦喬牛雜妹野蠻業主
（IG截圖）
前落選港姐「牛雜妹」李亦喬（Monnie，原名李美琪）因疫情關係，2個月冇工開零收入，一度要轉職做OL。牛雜妹最近又遇上麻煩事，她昨日在IG Story透露自己租約期滿，但交鎖匙後卻疑被「野蠻業主」刁難，指屋內的馬桶好污糟、有漬，又指地下有狗毛，清潔不夠乾淨，要求在上期按金扣錢。
牛雜妹扯火留言：「人生第一次租屋，租租下換咗業主，仲要係一對勁煩嘅情侶。本身好似好好傾好nice，仲話唔介意冇咩問題可以畀我住一年半，點知住咗半年話想趕結婚要自住趕我走，好意思問我一個月內可唔可以搬走，佢會好大方咁還返上期按金畀我。大佬呀，上期按金本身就係我㗎啦，我唔肯走照住夠一年。依家完咗租約，交晒鎖匙先同我講話個馬桶好污糟，好多漬。佢哋本身都會全部大裝修廁所，都會扑過再整，但佢裝修師傅話幫佢扑爛個廁所都會因為咁加價，大佬啊，係屎漬我唔介意幫你抹，但你個馬桶啲銹，我幫你唔到囉。」
牛雜妹還上載一張全屋清空及掃地後的相片，續寫道：「大佬，想冇住過嘅痕迹，唔好租畀人，當初一早賠錢叫我走呀嘛！問咗律師嘅意見，你根本係無理取鬧。我唔會咁輕易俾你蝦。」《蘋果》今日致電牛雜妹，她表示問題仍未解決：「真係前所未見，第一次租屋就咁，噚晚交鎖匙走咗，講明7日內要退回上期按金，但業主突然發難，話清潔問題，要扣我哋啲按金，我問咗三個律師，佢哋輸梗，因為無理！」她表示現在仍未知被扣金額：「未講扣幾多，但間屋係3、40年樓齡，正常老化一定有，如果佢哋畀唔足我，就會去小額錢債審裁處，真係冇諗過會遇到咁野蠻業主！」
牛雜妹因為馬桶有漬及地下有狗毛，被業主要求在上期按金扣錢。（IG截圖）
牛雜妹交樓前，都已經掃一次地下，已做好基本清潔。（IG截圖）
牛雜妹曾參加港姐，惜16強止步。（IG截圖）
疫情關係，牛雜妹兩個月零收入，一度去做OL。（IG截圖）
牛雜妹與圈外男友拍拖3年。（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！