「巴基之星」喺精英碟拒絕展步，成為全港熱話，記得一年前嘅6月，「巴基之星」大漏閘下由包尾追上贏馬，即被封為星球馬，威到連巴基斯坦電視台都有報道。

「巴基之星」嘅人氣，令居港多年嘅巴基斯坦籍馬主丁志強廣受外界認識，馬圈其實都有另一位巴基斯坦籍猛人，就係今晚（28日）快活谷第一場五班2200米「阿姆利則」馬主Syed Pervez Hussain，佢喺遠東地區從事貿易生意超過40年，喺02年至05年仲擔任巴基斯坦駐南韓領事，喺商界同外交界份量十足。

「阿姆利則」同「巴基之星」一樣，上仗都強配莫雷拉，只得第10名，但減咗1分後，今晚首次降落5班出賽，對手實力同上場差一大截，「阿姆利則」曾喺四班跑獲殿軍，的確有晒班利。莫雷拉今場唔再騎「阿姆利則」，但接手之祈普敦直指「阿姆利則」上仗輸形勢多過輸實力，唔需要太過上心，今場抽3檔會主動搶前，希望一降班即有好表現。

「阿姆利則」呢個馬名夠晒特別，英文名就係Amritsaria，「阿姆利則」乃印度西北面一個城方，非常接近巴基斯坦邊境，名字有花蜜同池塘意思，究竟這地方對馬主有乜重要意義，真係要問佢先知。