ViuTV首個自家劇《瑪嘉烈與大衛系列綠豆》爆出兩個導演同原著作者兼監製及編劇南方舞廳不和，身為男主角大衛嘅林保怡，冇話企喺邊一方，只係覺得雙方應該包容同有器量。

保怡今日喺電話度話：「我以一間茶餐廳比喻，後面啲廚師打大交都好啦，到出到嚟嗰碟菜，o依家上咗枱，大家都食完，成件事大家都已經贏晒o架啦，《瑪嘉烈與大衛》呢套劇對ViuTV嚟講係一個好好強心針，所以我覺得大家器量應該大小小，我哋大家都係為咗件事好，大家應該彼此有個包容，o依家件事出咗嚟係太好啦......。」

「如果我係南方舞廳，自己寫啲嘢出嚟，本來寫ABC大草，我好想你哋寫ABC大草，點解你哋重要寫細草，重要係cba呢？因為佢唔係成日跟場，佢會唔明白點解呢個創作會咁。其實兩個導演都好有potential，我哋唔好理佢新定係舊，佢哋嘅視點拍嘅嘢，佢哋睇完劇本再喺現場同我哋傾個故仔，其實我同兩個導演之間都有個共通點，係拍好呢個劇，將每場戲拍到最好睇.....我見南方舞廳有時嚟到，佢哋三方面都有溝通，我自己都有同Ruby(南方舞廳)溝通，我都有好幾場戲有疑問。」

咁佢覺得誰是誰非？保怡話：「咁有一點，我接觸都係接觸金廣誠，佢話佢係監製，因為我冇留意，係佢哋話比我知監製唔係金廣誠，係南方舞廳喎，咁我聽一聽就算啦，亦冇問。」保怡仲企喺中間，以和為貴咁話：「係呀，我哋應該向前看，唔應該再睇番後面啲嘢，大家都好好，兩個導演好藝術，南方舞廳創作又好，只不過可能有一點，你寫小說好好，但寫劇本未必可以好到題，所以我先至會加嘢，南方舞廳都唔介意㗎。」

對於傳聞兩位導演要改劇本，但廖碧兒因為跟足劇本，變得冇所適從，兩位導演搞唔掂廖碧兒，結果要南方舞廳在場先搞掂，保怡就話：「其實Bernice（廖碧兒）最大弱點係佢係英文人，佢劇本全部要拼晒音，我初初以為佢咁多年都冇問題啦，點知唔係喎，佢到o依家都重係咁，咁冇辦法，我都會就住佢去做，因為佢真係要拼音，如果突然之間改咗，佢真係唔識答你，咁呢個又唔係一個咁大問題嚟嘅。Ruby喺現場，Bernice會比較有信心啲啩。」

聽聞ViuTV唔會再錄用嗰兩個導演，如果將來換咗導演，你會唔會否再拍《瑪嘉烈與大衛》？保怡就話有嘢緊要過組合：「我唔知個組合係點，因為之前拍，我完全乜嘢分場都冇，下一次我會有小小要求，希望有晒劇本先至拍，麻煩比晒劇本我先啦。」

o依家事件仲有爭拗，保怡就拍心口做和事佬：「會，應該拉埋一齊食餐飯啦，大家唔好咁小朋友啦，大家都出嚟做嘢，有邊個唔改劇本啫？有邊個高層唔會改變主意啫？我樂於出錢請食飯都得，韋家輝同曾謹昌當年拍《大時代》都開晒拖，o依家咪又係好朋友。既然大家都打勝咗呢場仗，點解重要咁呢。」