當年今日

【聽力得番三成】拍戲搞到周身損傷 釋彥能:追求完美過程真係好艱辛

蘋果日報 2018/11/24 17:31

葉問外傳:張天志釋彥能

喺2003年因為拍周星馳嘅電影《功夫》而被賞識嘅釋彥能(前名:釋行宇),喺電影圈多咗演出機會,身酬仲十級跳,o依家嘅片酬有港幣三百萬,喺香港、深圳同山東仲有唔少物業,粗略估計已經有半億身家!不過呢啲錢真唔容易賺,好似之前拍《導火線》畀人打穿左耳耳膜,近期拍《葉問外傳:張天志》嘅時候,喺外籍演員Dave Bautista嘅重擊之下搞到頸椎移位;點知最近又為咗新戲練習潛水,因為水壓問題而令舊患復發,聽講聽力嚴重受損。
今日釋彥能接受《蘋果》訪問,講到聽力問題,佢話:「其實呢個問題係拍《導火線》而受傷,o依家聽力很差,得番三成左右,所以平時講話需要好大聲!拍戲時需要企喺適當嘅位置,o依家只可以希望唔好再惡化。」
後來又問拍《葉問外傳:張天志》嘅受傷經過,佢就話:「嗰陣我係坐喺凳度,唔單止雙手反綁,連對腳都綁住咗,完全郁唔到,需要拉威也襯托Dave一拳嘅威力,點知嗰一拳嘅力量確實好大,一拳打咗喺胸口,威也拉過咗頭,條頸即場郁唔到,唯有死頂忍住劇痛拍埋啲戲,o依家仲有啲後遺症,未完全康復。」
雖然拍戲經常搞到周身損傷,不過釋彥能話:「片酬從來唔係我在意嘅地方,我追求好劇本、好角色,等我可以發揮所長,有時候為咗追求完美嘅動作鏡頭,需要精益求精,受傷係在所難免。」但係話晒o依家總算捱出頭,手頭上又揸住唔少物業,唔知又有冇諗過成家立室呢?佢就話:「我o依家仲係單身,希望一切隨緣,遇到啱嘅,自然成家立室。始終做動作演員唔容易,過程真係好艱辛,需要拼搏事業再攀高峰,希望可以俾對方一個安定溫暖嘅家。」
Google Play 2018 年度最受歡迎應用程式,
請即點擊 http://bit.ly/2FCthz5 投《蘋果動新聞》一票
精選娛聞,喺晒《娛果》
http://fb.com/appledailyent