為咗簽得心頭好，紅軍不惜豪擲4億改寫隊史！利物浦周四宣佈，由羅馬簽入埃及翼鋒穆罕默德沙拿，交易將於7月1日正式落實，據報潛在轉會費高達3,900萬鎊（約3.9億港元），打破2011年由紐卡素簽入英格蘭前鋒安祖卡路爾嘅3,500萬鎊球會轉會費紀錄！

26歲嘅沙拿出道初期喺瑞士超巴素利表現出色，2014年1月獲車路士以1,100萬鎊收歸旗下，但效力一年就俾時任領隊摩連奴外借至意甲費倫天拿，後來外借羅馬表現更上一層樓，去年夏天以1,500萬鎊永久轉會，事隔一年即以翻倍價錢加盟利物浦，周二完成體測後正式結束一個月嘅轉會傳聞，據報周薪達9萬鎊（約90萬港元）。沙拿表示：「我過去一年一直有留意紅軍比賽，每位球員以至領隊都付出100%爭勝，希望我哋能夠為球迷、球會同自己爭取錦標。」沙拿亦會取代羅拔圖法明奴着起11號波衫，法明奴就改穿9號。

利物浦今夏率先由車路士簽入英格蘭世青盃最佳球員得主蘇蘭基，據報其餘轉會目標包括RB萊比錫中場拿比基達等，清洗對象就包括艾拔圖摩蘭奴、馬馬度沙高同拿沙馬高域。