噚日係拆禮物日,唔少公司之前都會送吓禮物籃畀各方友好聊表心意。Kenny就同華華講,今年唔見晒啲名貴禮物籃,收到最特別嘅禮物,算係一棵裝飾用嘅迷你聖誕樹。不過,點都唔夠經絡按揭首席經濟分析師劉圓圓(Sharmaine)慘,佢話聖誕節都冇乜收到聖誕禮物,只係同屋企人食餐飯聚吓咁。話晒Sharmaine都係財金界靚女,香港討論區仲有好多人猛讚佢靚女,一班傾慕Sharmaine嘅男網友似乎唔多識做。
至於獨立股評人青姐胡孟青,就好少理啲禮物籃質素,佢話自己不嬲對聖誕呢啲日子冇乜感覺,見到禮物籃來來去去都係朱古力、Christmas pudding之類嘅甜嘢,都冇乜興趣,但係話晒小朋友對聖誕好有憧憬,所以青姐帶咗小朋友去迪士尼玩,仲送咗卡通《武士戰隊》同《幪面超人W》嘅玩具畀囝囝。華華記得之前打畀青姐,佢咁啱又喺迪士尼,睇嚟青姐可以做埋迪士尼代言人噃。
除咗禮物籃冇咗往年嘅豪氣之外,就連記事簿同月曆都收少咗,睇嚟都係因為各大企業要諗計節流。有人話禮物籃係經濟寒暑表,港府對今年經濟增長預測都只得1.2%,唔通真係要積穀防飢好過年?
李華華
mailto:
[email protected]