上禮拜五花旗兩大巨頭分別有嘢講，伯南克話金融市場嘅波動如果損害經濟，喺有需要嘅時候聯儲局會採取行動。佢講完嘢之後，花旗股市升勢放緩，原因係佢嘅講話提到，聯儲局係冇責任打救投資者，股民好似畀盆冷水潑落嚟，希望聯儲局減息打救嘅願望落空，不過，布殊就出招救市，話會為一啲斷供嘅次按業主擔保。美股再出現反彈，最後升119點。
布殊托市招數有冇效要睇吓先知，但係就肯定係一個炒上嘅藉口，炒上嘅藉口有個特點，就係唔理佢有冇效，一於話佢有效，遲啲就可以用番懷疑佢有冇效做番淡。唔理咁多，港股上禮拜五創新高，今日好友應該會食住個勢炒上，恒指隨時炒上24500，短炒都係以「六行三保」嘅勝算較大。

財險C輪9586：中財險（2328）上禮拜五收9.84元，10日線升破20日線，出現「黃金交叉」，呢個禮拜可能會做番齣好戲，再炒上11.60元嗰頭，可以買啲財險C輪9586，現價3.79元，有效槓桿率2.5倍，對冲值0.97，正股升上11.60元，9586應該喺5.50元樓上，正股跌穿9.25元止蝕。