李美慧今日出嫁，富商老公曾文豪接過新娘後，轉到淺水灣舉行婚禮，兩位姊妹團成員楊埕同郭千瑜一齊接受訪問，講到今朝接新娘，楊埕笑住話：「新郎哥同班兄弟一嚟到，就想開門衝入嚟，我咁啱喺門口發現，即刻用盡力頂住對門，但係佢哋兄弟團一個人已經等於我哋4個，所以最後都係失手，推開咗門入屋。」

不過開門利是一樣有得收，其實今朝兩人開live時已經輕輕騷過一次厚厚嘅開門利是，傳聞價值兩億，新郎哥曾文豪受訪時話：「講笑啫！」而郭千瑜受訪時，就喺個袋度拎出封開門利是，見到全部係1千蚊紙，仲有成串咁厚，楊埕大讚新郎：「男家好大方，女方嫁得好，Peter（曾文豪）份人好好，乜都OK。今朝其中一個玩新郎環節，要喺尿片食啲嘢，本來唔使佢食，但佢都搶住食，仲話好肚餓，所以啲遊戲難唔到佢哋，兄弟團個個又好有義氣，做唔到嘅環節都會畀利是，唔會托手㬹。」問到兄弟團有冇合適對象？楊埕大嘆：「佢哋已經結晒婚。」郭千瑜笑話：「不過唔緊要，我哋仲有大把時間。」

至於愛的宣言，楊埕笑爆牧師好長氣：「講嘅經文同愛的宣言一樣咁長，用普通話講咗6、7分鐘之後，牧師想再講廣東話講多次，大家即刻話唔好再講，因為都係同一樣嘢。」佢仲話一對新人講愛的宣言時都有喊：「我識新娘一段時間，佢係一個好堅強嘅女仔，平時唔易喊，今日喊咗好多次，註冊儀式戴婚戒一刻已經喊，講宣言致辭唔夠30秒又喊。」

精選娛聞，喺晒《娛果》
http://fb.com/appledailyent