身為人夫兼人父的周永恒近日被爆家暴，老婆趙頌茹日前報警指遭周永恒推跌，傷及下巴，周永恒仲被指搭上模特兒公司合作拍檔，兼經理人的港視小花劉依靜。

雖然周永恒指與劉依靜已分手，問他是否擔心阿Yu提出離婚？他說：「畀啲空間我哋，我答乜都冇用，我哋要沉澱。」是否已聯絡到阿Yu？他說：「唔回應，我同佢有協議大家要冷靜。」之後他越說越輕佻：「不如《蘋果》公投啦，睇吓我哋一唔一齊番，或者揀吓我做邊份工啦。唔係交代畀大眾，總之全部都唔回應，我有自己選擇同空間，唔回應咁多。你哋出糧啫，我使唔使收番你哋稿錢呀，我做呢啲新聞大家係咪睇到好有娛樂性？我又冇錢收，你哋又有紙賣。」

周永恒及後又自嘲：「我有乜錢喺公眾人物搵番嚟，你列個表畀我，唔好玩我啦，總之禮拜五上庭會認罪，屋企仲有好多好細嘅嘢，唔諗住講出嚟，好多家庭問題要處理。」周永恒說罷匆匆收線，事後卻WhatsApp說：「我唔想將呢單新聞變成茶餘飯後話題，就算係都等我處理咗屋企問題先，唔好意思啱啱咁收你線。」對於態度輕佻，周永恒解釋：「我好輕鬆啫，唔係輕佻，我鬆到覺得我同老婆件事終於有空間，同佢傾完大家想要啲空間，好開心，剩低交時間決定。」